Xans-Diter Flik «Barselona»ni yana bir bor La Liga chempionligiga yetaklab keldi. Yakshanba kuni kataloniyaliklar Madridning «Real» klubini mag‘lub etib (2:0), muddatidan oldin Ispaniya chempioni nomini qo‘lga kiritishdi.
«Bu yerga kelib to‘g‘ri qaror qabul qilganimni bilardim. Birinchi kundanoq meni juda iliq kutib olishdi. Deku, Laporta va butun shahar ahli menga katta mehr ko‘rsatishdi. Bu yerda o‘zimni juda qulay his qilyapman va bularning barchasini cheksiz qadrlayman. Avval ishlagan joylarimning hech birida bunga o‘xshash holatni ko‘rmaganman», — deya Flikning so‘zlarini keltiradi The Touchline nashri.
Germaniyalik mutaxassis qo‘l ostida «ko‘k-anorranglilar» ikki mavsum ichida ichki arenadagi oltita sovrindan beshtasini qo‘lga kiritishdi. Murabbiyning amaldagi shartnomasi 2027 yilgacha mo‘ljallangan, biroq yaqin orada u uzaytirilishi kutilmoqda.
