«Barselona» darvozaboni Voysex Shesni jamoadoshi Joan Garsiyaning mahoratiga yuqori baho berdi.

36 yoshli polshalik posbon yana bir bor «ko‘k-anorranglilar»ning asosiy tarkibidan joy olishga da’vogar emasligini, chunki raqobatchisidan sezilarli darajada ortda qolayotganini tan oldi.

«Buni anglash g‘alati, lekin faoliyatimda ilk bor o‘zimdan ancha kuchli bo‘lgan darvozabon bilan bir jamoada to‘p suryapman. «Roma»da Alisson ham ajoyib edi, biroq u vaqtda u hali keyingi darajasiga chiqib ulgurmagandi. Joan Garsiya bilan bog‘liq vaziyat esa boshqacha. U bilan "Barsa"ning kelajagi ishonchli qo‘llarda. Men endi elita darajasida emasman, shuning uchun vazifam Garsiya bilan raqobatlashish emas, balki uni qo‘llab-quvvatlashdir», — deya Shesnining so‘zlarini keltiradi Barca Universal.

Eslatib o‘tamiz, o‘tgan yakshanba kuni Joan Garsiya «Barselona»ning madridlik ta’qibchisi «Real» ustidan qozonilgan «quruq» g‘alabasiga (2:0) o‘z hissasini qo‘shgan edi.