«Барселона» дарвозабони Войцех Шесни жамоадоши Жоан Гарсиянинг маҳоратига юқори баҳо берди.

36 ёшли полшалик посбон яна бир бор «кўк-анорранглилар»нинг асосий таркибидан жой олишга даъвогар эмаслигини, чунки рақобатчисидан сезиларли даражада ортда қолаётганини тан олди.

«Буни англаш ғалати, лекин фаолиятимда илк бор ўзимдан анча кучли бўлган дарвозабон билан бир жамоада тўп суряпман. «Рома»да Алиссон ҳам ажойиб эди, бироқ у вақтда у ҳали кейинги даражасига чиқиб улгурмаганди. Жоан Гарсия билан боғлиқ вазият эса бошқача. У билан "Барса"нинг келажаги ишончли қўлларда. Мен энди элита даражасида эмасман, шунинг учун вазифам Гарсия билан рақобатлашиш эмас, балки уни қўллаб-қувватлашдир», — дея Шеснининг сўзларини келтиради Barca Universal.

Эслатиб ўтамиз, ўтган якшанба куни Жоан Гарсия «Барселона»нинг мадридлик таъқибчиси «Реал» устидан қозонилган «қуруқ» ғалабасига (2:0) ўз ҳиссасини қўшган эди.