Portugaliyaning “Benfika” klubi bosh murabbiy Joze Mourinyoni 17 mayga qadar qo‘yib yubormoqchi emas, biroq ushbu sanadan so‘ng uning Madridning “Real” klubiga o‘tishiga rozilik berishga tayyor. Bu haqda jurnalist Yagiz Sabunjuo‘g‘li o‘zining X sahifasida xabar berdi.

Lissabon klubi ehtimoliy kelishuvning moliyaviy shartlarini kelishib oldi. Unga ko‘ra, agar Mourinyo “Real”ga o‘tadigan bo‘lsa, “Benfika” 6 million yevro miqdorida tovon puli oladi. Manbaning ta’kidlashicha, Mourinyoning o‘zi ham “qirollik klubi” bilan muzokaralarni davom ettirmoqda. Tomonlar mutaxassisning Madridga qaytishi borasidagi tafsilotlarni muhokama qilmoqda.

Mazkur kelishuvda 17 may hal qiluvchi muddat bo‘lib xizmat qiladi. Shu kuni “Benfika” chempionatdagi so‘nggi o‘yinida “Eshtoril”ga qarshi maydonga tushadi. Lissabon klubi ayni paytda Chempionlar Ligasiga yo‘llanma beruvchi pog‘ona uchun “Sporting” bilan jiddiy kurash olib bormoqda.

Ma’lumot uchun, portugaliyalik mutaxassis 2010 yildan 2013 yilgacha “Real”da faoliyat yuritgan va bu davr mobaynida uchta sovrinni qo‘lga kiritgan. Mourinyo Madrid klubidagi avvalgi faoliyati davomida La Liga, Ispaniya kubogi va Ispaniya Superkubogida g‘olib chiqqan edi.