Floyd Meyvezer va Menni Pakyao rasmiy professional jang o‘tkazish bo‘yicha yangilangan shartnoma shartlarini kelishib oldilar. Bu haqda The Ring nashri xabar bermoqda.
Manny Pacquiao Promotions bosh direktori Jas Maturning ma’lum qilishicha, revansh jangi 25 sentyabr, juma oqshomida Las-Vegasdagi T-Mobile Arenada bo‘lib o‘tadi. Jang translyasiyasi huquqi Netflix platformasiga tegishli.
Avvalroq, fevral oyida jang 19 sentyabr kuni Sphere arenasida o‘tkazilishi e’lon qilingan edi. Biroq mart oyi oxirida Meyvezer bu rasmiy emas, balki ko‘rgazmali jang bo‘lishini va manzil hali aniq emasligini aytgandi. Shunga qaramay, The Ring nashri Meyvezer tomonidan imzolangan hujjatlar bilan tanishib chiqdi — unda bu jang ko‘rgazmali emas, balki bokschining rasmiy rekordiga kiritiladigan professional jang bo‘lishi ko‘rsatilgan.
Endilikda 49 yoshli Meyvezer o‘zining mag‘lubiyatsiz rekordini xavf ostiga qo‘ygan holda, oradan 11 yil o‘tib Pakyao bilan yana bir bor ringga ko‘tariladi. Eslatib o‘tamiz, ularning birinchi jangi daromad keltirish bo‘yicha barcha rekordlarni yangilagan edi.
