Urugvaylik hujumchi Edinson Kavani maydonga qaytishga yaqin turibdi. U jarohatidan qutuldi va o‘z klubi — Argentinaning «Boka Xuniors» jamoasining navbatdagi mashg‘ulotlarida ishtirok etdi.
Kutilishicha, u jamoasining Libertadores Kubogi doirasida Braziliyaning «Kruzeyro» klubiga qarshi kechadigan navbatdagi o‘yinidayoq maydonga tushishi mumkin.
Eslatib o‘tamiz, «Matador» jarohati sababli qariyb uch oyni o‘tkazib yubordi. Bundan tashqari, so‘nggi vaqtlarda u Argentina matbuotining keskin tanqidlariga ham uchradi. Argentina OAVlari o‘z uslubi bilan Italiya matbuotiga juda o‘xshash bo‘lib (Argentina aholisining salmoqli qismi aynan Apennin yarim orolidan ko‘chib kelganlar avlodidir), e’tibordan chetda qolgan yoki formasini yo‘qotgan futbolchilarni ayab o‘tirmaydi.
