La Liga prezidenti Xavyer Tebas madridlik hamkasbi Florentino Peresga nisbatan keskin tanqid bilan chiqib, uni noto‘g‘ri ma’lumot tarqatishda aybladi. Tebas Peresning «Vocento» mediaguruhi va «Relevo» nashri haqidagi bayonotlariga munosabat bildirdi.

«U aldayapti. Ba’zan bizni 25 million bergan, ba’zan 10 million bergan deb aytadi. Bu haqiqat emas. Hatto hisob-kitoblarimizni tekshirish uchun ham kelishgandi», — deya Tebasning so‘zlaridan iqtibos keltiradi Sport.es.

Shuningdek, La Liga rahbari Peresning «Real» Madridga nisbatan go‘yoki g‘arazli munosabat borligi haqidagi pozisiyasini ham tanqid ostiga oldi:

«U doim kimdir uni ta’qib qilayotganini his qilib yashaydi. Doimiy ravishda o‘zini qurbon qilib ko‘rsatish obrazi yaratiladi».

Eslatib o‘tamiz, avvalroq Peres bir qator shov-shuvli bayonotlar, jumladan, «Barselona»ni hakamlarni sotib olganlikda ayblovchi chiqishlar qilgan edi.