Ла Лига президенти Хавьер Тебас мадридлик ҳамкасби Флорентино Пересга нисбатан кескин танқид билан чиқиб, уни нотўғри маълумот тарқатишда айблади. Тебас Переснинг «Vocento» медиагуруҳи ва «Relevo» нашри ҳақидаги баёнотларига муносабат билдирди.
«У алдаяпти. Баъзан бизни 25 миллион берган, баъзан 10 миллион берган деб айтади. Бу ҳақиқат эмас. Ҳатто ҳисоб-китобларимизни текшириш учун ҳам келишганди», — дея Тебаснинг сўзларидан иқтибос келтиради Sport.es.
Шунингдек, Ла Лига раҳбари Переснинг «Реал» Мадридга нисбатан гўёки ғаразли муносабат борлиги ҳақидаги позициясини ҳам танқид остига олди:
«У доим кимдир уни таъқиб қилаётганини ҳис қилиб яшайди. Доимий равишда ўзини қурбон қилиб кўрсатиш образи яратилади».
Эслатиб ўтамиз, аввалроқ Перес бир қатор шов-шувли баёнотлар, жумладан, «Барселона»ни ҳакамларни сотиб олганликда айбловчи чиқишлар қилган эди.
