Ispaniya qirollik futbol federasiyasi (RFEF) huzuridagi Hakamlar texnik qo‘mitasi (CTA) La Liganing 35-turidan o‘rin olgan «Barselona» va «Real» (2:0) uchrashuvidagi bahsli epizod yuzasidan bayonot berdi.

O‘yinning 54-daqiqasida madridliklar yarim himoyachisi Juud Bellingem raqib jarima maydonchasi ichida Erik Garsiyaning tirsagi tegishi natijasida yiqilgan edi. Angliyalik futbolchining labi yorilib, qon oqqan bo‘lsa-da, bosh hakam Alexandro Ernandes Ernandes qoida buzilishini qayd etmadi, VAR tizimi esa vaziyatga aralashmadi.

«Bu kabi epizodlardagi kontaktlar zarba kuchi, qasddan qilinganligi va oqibatlariga qarab baholanishi kerak. CTA nuqtai nazariga ko‘ra, bu harakat himoyalanayotgan o‘yinchining tabiiy harakat dinamikasi doirasida sodir bo‘lgan — u harakatlanayotganda qo‘li bilan raqibining yuziga tegib ketgan.

Bizningcha, maydonda qabul qilingan qaror o‘z kuchida qoldirilishi mumkin edi. Demak, biz turlicha talqin qilish mumkin bo‘lgan vaziyatga duch keldik va VAR falsafasiga ko‘ra, bu yerda yaqqol xato haqida gap ketayotgani yo‘q. Shu bois, videoassistentlarning vaziyatga aralashmagani protokolga muvofiq keladi», — deyiladi CTA bayonotida.