Fransiya Liga 1 doirasida «PSJ» safarda «Lans» ustidan 2:0 hisobida g‘alaba qozonib, navbatdagi chempionlikni naqd qildi. Ushbu muhim bahsda parijliklar darvozasini rossiyalik Matvey Safonov qo‘riqladi.

Uchrashuvdan so‘ng jamoa bosh murabbiyi Luis Enrike darvozabonning harakatlariga alohida to‘xtaldi.

«Matvey bu o‘yinda o‘zini ko‘rsata oldi. Ehtimol, uning o‘yini kimlarnidir hali ham hayratlantirayotgandir, lekin meni emas. Avval ham aytganimdek, jamoamizda uchta yuqori darajadagi darvozabon bor. Futbolchilarimiz har bir bahsda o‘zlarini ko‘rsatishlari shart», — deya ispaniyalik mutaxassisning so‘zlarini keltiradi Lequipe nashri.

Ma’lumot uchun, Safonov joriy mavsumda Liga 1 doirasida 14 ta uchrashuvda maydonga tushib, o‘z darvozasidan 12 ta to‘p o‘tkazib yubordi. «PSJ» esa ushbu g‘alabadan so‘ng muddatidan oldin mamlakat chempionligini qo‘lga kiritdi.