«Barselona» bosh murabbiyi Xans-Diter Flik «Real Madrid» prezidenti Florentino Peresning so‘nggi shov-shuvli bayonotiga munosabat bildirishni istamadi. Avvalroq «qirollik klubi» rahbari La Ligada «Real»dan «ettita chempionlik tituli o‘g‘irlangani» haqida gapirgan edi.

Chorshanba kuni «Alaves»ga qarshi kechgan o‘yindan (0:1) so‘ng jurnalistlar germaniyalik mutaxassisdan Peresning ushbu iddaolariga munosabat so‘rashdi. Biroq Flik bahs-munozaraga kirishishdan qochdi.

«Menimcha, bu gaplar javob berishga loyiq emas», — deya qisqa qildi «Barselona» ustozi.

Eslatib o‘tamiz, «Barselona» o‘tgan yakshanba kuni aynan «Real»ni o‘zaro bahsda (2:0) mag‘lub etib, muddatidan oldin Ispaniya chempionligini qo‘lga kiritgan edi. «Alaves»dan qabul qilingan mag‘lubiyat kataloniyaliklar uchun chempion sifatidagi ilk muvaffaqiyatsizlik bo‘ldi.