«Inter Mayami» hujumchisi Lionel Messi MLS muntazam chempionati doirasida «Sinsinnati»ga qarshi kechgan bahsda (5:3) dubl qayd etdi. 38 yoshli argentinalik yulduz uchrashuvning 24 va 55-daqiqalarida raqib darvozasini ishg‘ol qildi.

E’tiborli jihati shundaki, Messi 89-daqiqada ham gol urishga muvaffaq bo‘lgan edi. Dastlab o‘yin qaydnomasida hujumchi xet-trik qayd etgani yozilgan bo‘lsa-da, keyinchalik uchinchi gol protokolda avtogol sifatida qayta rasmiylashtirildi.

Agar ushbu gol inobatga olinganda, bu Messining faoliyatidagi 61-xet-trigi bo‘lar edi. Lionel so‘nggi bor 2025 yilning 18 oktyabrida «Neshvill»ga qarshi bahsda (5:2) uchta gol urishga muvaffaq bo‘lgandi.

Ma’lumot uchun, xet-triklar soni bo‘yicha mutlaq rekordchi «An-Nasr» hujumchisi Krishtianu Ronaldu hisoblanadi. Portugaliyalik yulduz faoliyati davomida 66 marta (klublarda 56, terma jamoada 10) bir o‘yinda uchta gol urishga erishgan.