«Интер Майами» ҳужумчиси Лионель Месси МЛС мунтазам чемпионати доирасида «Цинциннати»га қарши кечган баҳсда (5:3) дубль қайд этди. 38 ёшли аргентиналик юлдуз учрашувнинг 24 ва 55-дақиқаларида рақиб дарвозасини ишғол қилди.

Эътиборли жиҳати шундаки, Месси 89-дақиқада ҳам гол уришга муваффақ бўлган эди. Дастлаб ўйин қайдномасида ҳужумчи хет-трик қайд этгани ёзилган бўлса-да, кейинчалик учинчи гол протоколда автогол сифатида қайта расмийлаштирилди.

Агар ушбу гол инобатга олинганда, бу Мессининг фаолиятидаги 61-хет-триги бўлар эди. Лионель сўнгги бор 2025 йилнинг 18 октябрида «Нэшвилл»га қарши баҳсда (5:2) учта гол уришга муваффақ бўлганди.

Маълумот учун, хет-триклар сони бўйича мутлақ рекордчи «Ан-Наср» ҳужумчиси Криштиану Роналду ҳисобланади. Португалиялик юлдуз фаолияти давомида 66 марта (клубларда 56, терма жамоада 10) бир ўйинда учта гол уришга эришган.