«An-Nasr» bosh murabbiyi Jorje Jezush joriy mavsum yakunlanganidan keyin jamoani tark etishi kutilmoqda. Bu haqda portugaliyaning A Bola nashri xabar tarqatdi.

Manba ma’lumotiga ko‘ra, 71 yoshli mutaxassis o‘z qarori haqida klub rahbariyatini allaqachon ogohlantirgan.

Xabar qilinishicha, Jezush Saudiya Arabistonidagi faoliyatini yakunlab, faoliyatini boshqa mamlakatda davom ettirish variantlarini ko‘rib chiqmoqchi. Shu bilan birga, u mavsum oxiriga qadar faqat jamoa vazifalariga e’tibor qaratadi va ehtimoliy ish beruvchilar bilan muzokara olib borishni rejalashtirmayapti.

Ayni paytda «An-Nasr» chempionlik uchun kurashni davom ettirmoqda. Shuningdek, jamoa Osiyo Chempionlar ligasi-2 finaliga ham tayyorgarlik ko‘rmoqda. Finalda saudiyaliklar Yaponiyaning «Gamba Osaka» klubiga qarshi maydonga tushadi.

Shu bilan birga, may oyi oxirida Jezushning Lissabonda «Fenerbaxche» vakillari bilan uchrashuvi rejalashtirilgan. Turk klubi murabbiyga bir mavsum uchun taxminan 15 million yevro maosh taklif qilishga tayyor ekani aytilmoqda. Bu esa uning murabbiylik faoliyatidagi eng yirik shartnoma bo‘lishi mumkin.