«PSJ» bosh murabbiyi Luis Enrike o‘zining biznes faoliyatiga o‘zgartirishlar kiritdi. Ispaniyalik mutaxassis o‘ziga tegishli ko‘chmas mulk agentligining bosh direktorligi lavozimidan ketib, rahbarlikni rafiqasiga topshirdi. Bu haqda Goal axborot agentligi xabar bermoqda.

Uning Barselona shahrida joylashgan «Patrimonial Lupasi SL» kompaniyasi Ispaniya bozorida jiddiy mavqega ega. Mazkur ko‘chmas mulk agentligi 27 million yevroga baholanadi. Enrike kompaniyadagi rahbarlik lavozimini tark etishidan biroz avval biznesga 1,4 million yevro miqdorida qo‘shimcha mablag‘ kiritishga qaror qilgan. Ta’kidlash joizki, uning rafiqasi kompaniya faoliyati bilan juda yaxshi tanish. Shuningdek, u nufuzli Barselona universitetining iqtisod fakulteti diplomiga ega va ko‘chmas mulk bozorini mukammal tushunadi.