«Barselona» darvozaboni Mark-Andre ter Shtegen bo‘lajak transfer oynasida «Ayaks»ga ko‘chib o‘tishi mumkin. Yanvar oyida germaniyalik posbon o‘yin amaliyotiga ega bo‘lish uchun «Jirona»ga ijaraga berilgan edi, biroq ko‘p o‘tmay navbatdagi jiddiy jarohatni orttirib oldi va hanuzgacha undan butkul sog‘aygani yo‘q.

Mundo Deportivo nashrining xabariga ko‘ra, «Ayaks» 34 yoshli darvozabonni o‘z jamoasining yangi «birinchi raqami» sifatida ko‘rmoqda. Amsterdam klubi asosiy tarkibdan mustahkam joy egallashga qodir bo‘lgan tajribali posbon qidirmoqda.

Mark-Andre ter Shtegenning «Barselona» bilan amaldagi shartnomasi 2028 yilning yoziga qadar mo‘ljallangan, uning Transfermarkt portalidagi bahosi esa 4 million yevroni tashkil etadi. Joriy mavsum davomida futbolchi barcha musobaqalarda atigi 3 marta maydonda ko‘rinish berdi.