«Manchester Siti» bosh murabbiyi Xosep Gvardiola Angliya Kubogi finalida «Chelsi» ustidan qozonilgan g‘alabadan (1:0) so‘ng klubning kelajagi haqidagi savolga javob qaytardi. Shanba kuni «Uembli» stadionida bo‘lib o‘tgan uchrashuv taqdirini 71-daqiqada Antuan Semenyo tomonidan kiritilgan yagona gol hal qildi.
«Manchester Siti»ni porloq kelajak kutmoqda. Men yigitlarni yaxshi bilaman, ularning klubga va o‘z ishiga qanchalik sodiq ekanliklaridan xabardorman. Yaqin yillarda ham muvaffaqiyatlarga erishishda davom etishimizga mutlaqo ishonaman», — deya Gvardiolaning so‘zlarini keltiradi City Report nashri.
Ispaniyalik mutaxassisning amaldagi shartnomasi 2027 yilning o‘rtalariga qadar mo‘ljallangan. Bosh murabbiy shartnoma muddatini oxirigacha yetkazib qo‘yish niyati borligiga bir necha bor shama qilgan bo‘lsa-da, biroq uning shu yozda jamoadan ketishi haqida tarqalgan mish-mishlarni hozircha rasman va aniq rad etgani yo‘q.
