«Манчестер Сити» бош мураббийи Хосеп Гвардиола Англия Кубоги финалида «Челси» устидан қозонилган ғалабадан (1:0) сўнг клубнинг келажаги ҳақидаги саволга жавоб қайтарди. Шанба куни «Уэмбли» стадионида бўлиб ўтган учрашув тақдирини 71-дақиқада Антуан Семеньо томонидан киритилган ягона гол ҳал қилди.
«Манчестер Сити»ни порлоқ келажак кутмоқда. Мен йигитларни яхши биламан, уларнинг клубга ва ўз ишига қанчалик содиқ эканликларидан хабардорман. Яқин йилларда ҳам муваффақиятларга эришишда давом этишимизга мутлақо ишонаман», — дея Гвардиоланинг сўзларини келтиради City Report нашри.
Испаниялик мутахассиснинг амалдаги шартномаси 2027 йилнинг ўрталарига қадар мўлжалланган. Бош мураббий шартнома муддатини охиригача етказиб қўйиш нияти борлигига бир неча бор шама қилган бўлса-да, бироқ унинг шу ёзда жамоадан кетиши ҳақида тарқалган миш-мишларни ҳозирча расман ва аниқ рад этгани йўқ.
