«Barselona» yarim himoyachisi Fermin Lopes hujumchi Robert Levandovskining tez orada klubni tark etishi haqida o‘z fikrlarini bildirdi. Polshalik futbolchi «ko‘k-anorranglilar» bilan yakuniga yetayotgan shartnomasini uzaytirmaydi. Bugun forvard mavsumning so‘nggi uy uchrashuvi bo‘lmish «Betis»ga qarshi bahsda «Kamp Nou» muxlislari bilan xayrlashadi.
«Men Levandovskini sog‘inaman. Shaxsan o‘zim undan ko‘p narsa o‘rgandim. Hamma yutuqlarga erishgan, ulkan tajribaga ega buyuk futbolchi. Uning ketayotgani achinarli. Robert klubga og‘ir damlarda kelgan edi va bizga juda ko‘p yordam berdi. Nafaqat maydonda, balki kiyinish xonasida ham. Mana shunday futbolchilar tufayli jamoamiz yana muvaffaqiyatlarga qaytdi. Menga bo‘lgan iliq munosabati uchun undan juda minnatdorman», — deya Ferminning so‘zlarini keltiradi Barca Universal nashri.
Eslatib o‘tamiz, Robert Levandovski «Barselona»da to‘rt yil davomida to‘p surdi va kataloniyaliklar safida 191 ta uchrashuvda maydonga tushib, 119 ta gol urishga muvaffaq bo‘ldi.
