«Барселона» ярим ҳимоячиси Фермин Лопес ҳужумчи Роберт Левандовскининг тез орада клубни тарк этиши ҳақида ўз фикрларини билдирди. Польшалик футболчи «кўк-анорранглилар» билан якунига етаётган шартномасини узайтирмайди. Бугун форвард мавсумнинг сўнгги уй учрашуви бўлмиш «Бетис»га қарши баҳсда «Камп Ноу» мухлислари билан хайрлашади.
«Мен Левандовскини соғинаман. Шахсан ўзим ундан кўп нарса ўргандим. Ҳамма ютуқларга эришган, улкан тажрибага эга буюк футболчи. Унинг кетаётгани ачинарли. Роберт клубга оғир дамларда келган эди ва бизга жуда кўп ёрдам берди. Нафақат майдонда, балки кийиниш хонасида ҳам. Мана шундай футболчилар туфайли жамоамиз яна муваффақиятларга қайтди. Менга бўлган илиқ муносабати учун ундан жуда миннатдорман», — дея Ферминнинг сўзларини келтиради Barca Universal нашри.
Эслатиб ўтамиз, Роберт Левандовски «Барселона»да тўрт йил давомида тўп сурди ва каталонияликлар сафида 191 та учрашувда майдонга тушиб, 119 та гол уришга муваффақ бўлди.
