Londonning «Arsenal» klubi yarim himoyachisi Martin Subimendi mavsum yakuni haqidagi fikrlari bilan o‘rtoqlashdi. Yaqin haftalarda «to‘pchilar»ning Premyer-liga va Chempionlar ligasidagi taqdiri hal bo‘ladi. Mikel Arteta shogirdlari marraga ikki tur qolganida «Manchester Siti»ni ikki ochkoga ortda qoldirib, chempionatda peshqadamlik qilmoqda, Yevrokubokning hal qiluvchi bahsida esa «PSJ» bilan to‘qnash keladi.
«Biz hamma sovrinlarni qo‘lga kiritish uchun nima qilishimiz kerakligini aniq tushunib turibmiz. O‘z ishimizni bajarishimiz lozim. Barchasi o‘z qo‘limizda, shuning uchun, menimcha, boshqalar bilan nima sodir bo‘layotgani bizni xavotirga solmasligi kerak. Biz bor e’tiborimizni o‘zimizga qaratganmiz», — deya Subimendining so‘zlarini keltiradi Daily Mail nashri.
Eslatib o‘tamiz, APLning so‘nggi turidan o‘rin olgan «Kristal Pelas»ga qarshi uchrashuv 24 may kuni bo‘lib o‘tadi, Chempionlar ligasi finali esa 30 mayga rejalashtirilgan.
