"Liverpul" jamoasining fransiyalik bahaybat himoyachisi Ibraima Konate faoliyatini Ispaniya La Ligasida davom ettirishi mumkin. The Sun nashri tarqatgan xabarlarga qaraganda, "Barselona" Konate transferi ustida jiddiy bosh qotirmoqda.

Eng qizig‘i, "ko‘k-anorranglilar" ushbu top-himoyachini shu yozda erkin agent maqomida, ya’ni bir tiyin to‘lamasdan o‘z safiga qo‘shib olishni ko‘zlamoqda. Jamoa bosh murabbiyi Xans-Diter Flik yuqori himoya chizig‘ida bemalol o‘ynay oladigan va katta tezlikka ega bo‘lgan markaziy himoyachi qidirmoqda. Konate esa nemis mutaxassisining barcha talablariga to‘liq javob beradi.

Ma’lumot uchun, Ibraima Konate 2021 yilda "RB Leypsig" klubidan 40 million yevro evaziga "Liverpul"ga ko‘chib o‘tgan edi. Uning inglizlar bilan amaldagi shartnomasi shu yilning 30 iyuniga qadar mo‘ljallangan. Fransuz himoyachisi joriy mavsumda mersisaydliklar tarkibida barcha musobaqalarda 49 ta o‘yinda maydonga tushib, raqiblar darvozasini 2 bor ishg‘ol etishga ham ulgurdi.

Ayni damda Transfermarkt portali Konatening transfer bahosini 50 million yevroga baholamoqda.