"Ливерпуль" жамоасининг франциялик баҳайбат ҳимоячиси Ибраима Конате фаолиятини Испания Ла Лигасида давом эттириши мумкин. The Sun нашри тарқатган хабарларга қараганда, "Барселона" Конате трансфери устида жиддий бош қотирмоқда.

Энг қизиғи, "кўк-анорранглилар" ушбу топ-ҳимоячини шу ёзда эркин агент мақомида, яъни бир тийин тўламасдан ўз сафига қўшиб олишни кўзламоқда. Жамоа бош мураббийи Ханс-Дитер Флик юқори ҳимоя чизиғида бемалол ўйнай оладиган ва катта тезликка эга бўлган марказий ҳимоячи қидирмоқда. Конате эса немис мутахассисининг барча талабларига тўлиқ жавоб беради.

Маълумот учун, Ибраима Конате 2021 йилда "РБ Лейпциг" клубидан 40 миллион евро эвазига "Ливерпуль"га кўчиб ўтган эди. Унинг инглизлар билан амалдаги шартномаси шу йилнинг 30 июнига қадар мўлжалланган. Француз ҳимоячиси жорий мавсумда мерсисайдликлар таркибида барча мусобақаларда 49 та ўйинда майдонга тушиб, рақиблар дарвозасини 2 бор ишғол этишга ҳам улгурди.

Айни дамда Transfermarkt портали Конатенинг трансфер баҳосини 50 миллион еврога баҳоламоқда.