Madridning «Real» klubi hujumchisi Vinisius Junior La Liga doirasida «Sevilya»ga qarshi kechgan uchrashuvda (1:0) jarohat oldi. Braziliyalik futbolchi uchrashuvning 15-daqiqasida bahsdagi yagona golni kiritdi. Forvard o‘yinning eng yaxshi futbolchisi deb topildi, biroq uchrashuvni yakunigacha yetkaza olmadi — 77-daqiqada Alvaro Arbeloa uni zaxiraga olishga majbur bo‘ldi.

Shunga qaramay, futbolchining o‘z so‘zlariga ko‘ra, jarohat jiddiy bo‘lib chiqmadi, deb xabar bermoqda jurnalist Serxio Kirante. Stadionni tark etayotganda o‘zining sog‘lig‘i haqidagi savolga Vinisius: «Men yaxshiman», — deya javob qaytargan. «Qaymoqranglilar» ustozi ham 25 yoshli yulduzning jarohati u qadar jiddiy emasligiga sha’ma qildi.

23 may kuni «Real» so‘nggi tur doirasida o‘z maydonida Bilbaoning «Atletik» klubiga qarshi maydonga tushadi.