Мадриднинг «Реал» клуби ҳужумчиси Винисиус Жуниор Ла Лига доирасида «Севилья»га қарши кечган учрашувда (1:0) жароҳат олди. Бразилиялик футболчи учрашувнинг 15-дақиқасида баҳсдаги ягона голни киритди. Форвард ўйиннинг энг яхши футболчиси деб топилди, бироқ учрашувни якунигача етказа олмади — 77-дақиқада Альваро Арбелоа уни захирага олишга мажбур бўлди.
Шунга қарамай, футболчининг ўз сўзларига кўра, жароҳат жиддий бўлиб чиқмади, деб хабар бермоқда журналист Серхио Киранте. Стадионни тарк этаётганда ўзининг соғлиғи ҳақидаги саволга Винисиус: «Мен яхшиман», — дея жавоб қайтарган. «Қаймоқранглилар» устози ҳам 25 ёшли юлдузнинг жароҳати у қадар жиддий эмаслигига шаъма қилди.
23 май куни «Реал» сўнгги тур доирасида ўз майдонида Бильбаонинг «Атлетик» клубига қарши майдонга тушади.
