«Barselona» futbolchisi Rafinya Dias Robert Levandovskining klubdan ketishi borasidagi fikrlari bilan o‘rtoqlashdi.
37 yoshli hujumchi mavsumning o‘z maydonidagi so‘nggi uchrashuvi — «Betis»ga qarshi kechgan va 3:1 hisobidagi g‘alaba bilan yakunlangan bahsdan so‘ng «ko‘k-anorranglilar» muxlislari bilan xayrlashdi.
«Robert bilan birga o‘ynash men uchun sharaf edi. U klubga kelgan ilk kunidanoq o‘zini namunali professional sifatida ko‘rsatdi va bizga o‘z tajribasini ulashdi. Ayrim insonlarga muvaffaqiyatlardan so‘ng xotirjamlikka berilish xos bo‘ladi — Levandovski esa mutlaqo undaylar sirasidan emas. U «Barsa»ga kelguniga qadar hamma narsani yutib bo‘lgan, allaqachon afsonaga aylangan edi, biroq baribir g‘alaba qozonishni istardi. Bu to‘rt yil davomida undan o‘rgangan eng asosiy jihatim mana shu bo‘ldi. Bu mavsumda u doim ham maydonga tusha olmagan bo‘lsa-da, baribir o‘sha-o‘sha mehnatsevar bo‘lib qoldi. U barchamiz uchun namunadir», — deya Sevilya klubi darvozasiga dubl qayd etgan Rafinyaning so‘zlarini keltirmoqda Barca Universal nashri.
