«Барселона» футболчиси Рафинья Диас Роберт Левандовскининг клубдан кетиши борасидаги фикрлари билан ўртоқлашди.

37 ёшли ҳужумчи мавсумнинг ўз майдонидаги сўнгги учрашуви — «Бетис»га қарши кечган ва 3:1 ҳисобидаги ғалаба билан якунланган баҳсдан сўнг «кўк-анорранглилар» мухлислари билан хайрлашди.

«Роберт билан бирга ўйнаш мен учун шараф эди. У клубга келган илк куниданоқ ўзини намунали профессионал сифатида кўрсатди ва бизга ўз тажрибасини улашди. Айрим инсонларга муваффақиятлардан сўнг хотиржамликка берилиш хос бўлади — Левандовски эса мутлақо ундайлар сирасидан эмас. У «Барса»га келгунига қадар ҳамма нарсани ютиб бўлган, аллақачон афсонага айланган эди, бироқ барибир ғалаба қозонишни истарди. Бу тўрт йил давомида ундан ўрганган энг асосий жиҳатим мана шу бўлди. Бу мавсумда у доим ҳам майдонга туша олмаган бўлса-да, барибир ўша-ўша меҳнатсевар бўлиб қолди. У барчамиз учун намунадир», — дея Севилья клуби дарвозасига дубль қайд этган Рафиньянинг сўзларини келтирмоқда Barca Universal нашри.