Yakshanba oqshomida APLda jon saqlab qolish uchun kurashayotgan «Vest Xem» va «Tottenxem» jamoalari uchun o‘ta muhim o‘yin bo‘lib o‘tdi. Premyer-liganing 37-turi doirasida ligadagi o‘rnini allaqachon naqd qilgan «Nyukasl» o‘z maydonida «Vest Xem»ni qabul qildi va «bolg‘achilar» ustidan ishonchli g‘alabaga erishdi — 3:1.
Ushbu mag‘lubiyatdan so‘ng 18-o‘rinda borayotgan «Vest Xem» va xavfli hududdan yuqoridagi «Tottenxem» o‘rtasidagi farq saqlanib qoldi — jamoalar hisobida mos ravishda 36 va 38 ochko mavjud. Endi «Tottenxem» seshanba kuni 37-turning qoldirilgan bahsida safarda «Chelsi»ni mag‘lub etsa, keyingi mavsum uchun APLdagi o‘rnini rasman naqd qiladi.
Agar «shporlar» durang o‘ynashsa, ularda hali ham nazariy jihatdan ligadan chiqib ketish xavfi qoladi, biroq ikki jamoa o‘rtasidagi to‘plar nisbatidagi farq juda katta va u «Tottenxem» foydasiga hal bo‘lgan. Shuningdek, «Vest Xem» jon saqlab qolishi uchun «Tottenxem» qolgan ikki o‘yinda («Chelsi» va «Aston Villa»ga qarshi) mag‘lub bo‘lishi, «bolg‘achilar» esa so‘nggi 38-turda «Lids»ni mag‘lub etishlari shart bo‘ladi.
