«Arsenal» bosh murabbiyi Mikel Arteta APLning 37-turida «Bernli» ustidan qozonilgan 1:0 hisobidagi g‘alabadan so‘ng o‘z fikrlarini aytdi.
«O‘yin va natijadan juda mamnunman. Menimcha, birinchi bo‘limda mavsumdagi eng yaxshi o‘yinlarimizdan birini ko‘rsatdik. Hisobdagi farq yirikroq bo‘lishi kerak edi, ammo bunga erisha olmadik. Shunga qaramay, butun mavsum davomida qilgan ishimizni takrorladik: himoyalanish va o‘yinni g‘alaba bilan yakunlash kerak bo‘lganda, biz buni samarali uddalay olamiz.
Ikkinchi yoki uchinchi golni ura olmaganimiz — omadsizlik. Bizga qarshi kuchli raqib o‘ynadi. Ularning bugungi o‘yinda natijaga erishish uchun qanday ishtiyoq bilan harakat qilganiga qarang. Bu chempionat juda murakkab.
Biz o‘z ishimizni, qo‘limizdan kelgan barcha ishni qildik. Endi ertaga nima bo‘lishini kutamiz, so‘ngra «Pelas» bilan o‘yinga tayyorgarlik ko‘rish vaqti keladi.
«Bernli» o‘tgan hafta «Aston Villa»ga qarshi ham shunday o‘ynagandi, shuning uchun qiyin bo‘lishini bilardik. Biz mavsum davomidagi yuqori standartlarimizni saqlab qolishimiz va yana bitta o‘yinda g‘alaba qozonishimiz kerak», — dedi Arteta.
