«Manchester Yunayted» bosh murabbiyi Maykl Kerrik jamoa hujumchilari Benyamin Sheshko, Brayan Mbeumo va Mateus Kunyaning joriy mavsumdagi o‘yin darajasi haqida fikr bildirdi.
«Yigitlarning har biri klubdagi ilk mavsumini a’lo darajada o‘tkazdi. Gollar va assistlar borasida ularni maqtashim mumkin. Qiyinchiliklarni yengib o‘tish, moslashish va mavsum davomida kuchayib borish juda muhim. Keyingi mavsum yangi sinovlarga boy bo‘ladi va kamida hozirgi darajani saqlab qolish — ana shunday vazifalardan biri. Men bu futbolchilarning har biridan mamnunman va ishonchim komilki, bundan keyin hammasi yanada yaxshi bo‘ladi», — deya Kerrikning so‘zlarini keltirmoqda mankunianliklar rasmiy sayti.
Joriy klub mavsumidagi statistik ko‘rsatkichlar:
-
Benyamin Sheshko: 32 o‘yinda 12 ta gol va 1 ta golli uzatma.
-
Brayan Mbeumo: 33 o‘yinda 11 ta gol va 3 ta assist.
-
Mateus Kunya: 35 o‘yinda 10 ta gol va 4 ta golli uzatma.
Yangi kelgan hujumchilarning birinchi mavsumdayoq bunday natija ko‘rsatishi Kerrik uchun katta yutuq. Ayniqsa, Sheshkoning samaradorligi jamoaning hujum chizig‘idagi muammolarini ancha kamaytirgan ko‘rinadi. Bu uchlikning keyingi mavsumda yanada jipslashib ketishi «Yunayted» muxlislari uchun umidli yangilik.
