«Манчестер Юнайтед» бош мураббийи Майкл Кэррик жамоа ҳужумчилари Беньямин Шешко, Брайан Мбеумо ва Матеус Куньянинг жорий мавсумдаги ўйин даражаси ҳақида фикр билдирди.

«Йигитларнинг ҳар бири клубдаги илк мавсумини аъло даражада ўтказди. Голлар ва ассистлар борасида уларни мақташим мумкин. Қийинчиликларни енгиб ўтиш, мослашиш ва мавсум давомида кучайиб бориш жуда муҳим. Кейинги мавсум янги синовларга бой бўлади ва камида ҳозирги даражани сақлаб қолиш — ана шундай вазифалардан бири. Мен бу футболчиларнинг ҳар биридан мамнунман ва ишончим комилки, бундан кейин ҳаммаси янада яхши бўлади», — дея Кэррикнинг сўзларини келтирмоқда манкунианликлар расмий сайти.

Жорий клуб мавсумидаги статистик кўрсаткичлар:

• Беньямин Шешко: 32 ўйинда 12 та гол ва 1 та голли узатма.

• Брайан Мбеумо: 33 ўйинда 11 та гол ва 3 та ассист.

• Матеус Кунья: 35 ўйинда 10 та гол ва 4 та голли узатма.

Янги келган ҳужумчиларнинг биринчи мавсумдаёқ бундай натижа кўрсатиши Кэррик учун катта ютуқ. Айниқса, Шешконинг самарадорлиги жамоанинг ҳужум чизиғидаги муаммоларини анча камайтирган кўринади. Бу учликнинг кейинги мавсумда янада жипслашиб кетиши «Юнайтед» мухлислари учун умидли янгилик.