«Chelsi»ning sobiq futbolchisi Jon Obi Mikel Xabi Alonsoning «ko‘klar» bosh murabbiyi etib tayinlanishiga munosabat bildirdi.
«Xabi Alonso «Chelsi»ga kelganidan juda ham xursandman va baxtiyorman. Menimcha, u ajoyib murabbiy. U yosh va iqtidorli mutaxassis deb hisoblayman. Uning «Bayer» bilan nimalarga erishganini ko‘rdik — ular Bundesligada birorta ham o‘yinda mag‘lub bo‘lmay, «Bavariya»ning gegemonligiga chek qo‘yishdi. U «Bayer» bilan mutlaqo fantastik futbol namoyish etgan holda bunga erisha oldi. Bundan tashqari, u Xosep Gvardiolaning shogirdi hisoblanadi. Uning o‘yin uslubi, uchrashuvda ustunlik qilish, hujumkorlik va yuqori pressingga asoslangan qarashlari — aynan biz ko‘rishni istagan narsadir. Chunki tarkibimizda iqtidorli futbolchilar bor va buni amalga oshirish uchun salohiyatimiz yetarli», — dedi Obi Mikel o‘z podkastida.
Eslatib o‘tamiz, Xabi Alonso «Chelsi» bilan 2030 yilning yoziga qadar mo‘ljallangan shartnoma imzoladi. U jamoa bilan ish boshlashga 1 iyuldan kirishadi.
