Luis Enrike murabbiylik faoliyatini qaysi yoshgacha davom ettirishni rejalashtirayotgani haqida fikr bildirdi.

«PSJ» bosh murabbiyidan jurnalistlar ko‘plab mutaxassislar 60 yoki hatto 70 yoshgacha ishlashini eslab, o‘zi qancha vaqt murabbiy bo‘lib qolishini so‘rashdi.

56 yoshli ispaniyalik mutaxassis bu savol haqida o‘zi ham tez-tez o‘ylashini aytdi:

— Bu juda yaxshi savol, chunki men ham bu haqda o‘ylayman. Rafiqamga doim: “Murabbiylar o‘rindig‘idagi qari jahldor insonga aylangim kelmaydi”, deyman. Shunday bo‘lishni istamayman, ammo yillar o‘tgani sari futbolda shunday insonlar ko‘payib borayotganini ko‘ryapman.

Enrike shuningdek, 60 yoshdan keyin faoliyatini yakunlashi mumkinligiga ishora qildi:

— Men hazil tariqasida ukam Felipega: “Men sendan oldinroq pensiyaga chiqishim kerak”, deyman. U mendan bir yosh kichik, hozir 55 yoshda va 61 yoshida pensiyaga chiqmoqchi. Endi o‘zingiz hisoblayvering, — dedi mutaxassis.

Ma’lumot uchun, Luis Enrikening «PSJ» bilan amaldagi shartnomasi 2027 yilgacha mo‘ljallangan.