Луис Энрике мураббийлик фаолиятини қайси ёшгача давом эттиришни режалаштираётгани ҳақида фикр билдирди.

«ПСЖ» бош мураббийидан журналистлар кўплаб мутахассислар 60 ёки ҳатто 70 ёшгача ишлашини эслаб, ўзи қанча вақт мураббий бўлиб қолишини сўрашди.

56 ёшли испаниялик мутахассис бу савол ҳақида ўзи ҳам тез-тез ўйлашини айтди:

— Бу жуда яхши савол, чунки мен ҳам бу ҳақда ўйлайман. Рафиқамга доим: “Мураббийлар ўриндиғидаги қари жаҳлдор инсонга айлангим келмайди”, дейман. Шундай бўлишни истамайман, аммо йиллар ўтгани сари футболда шундай инсонлар кўпайиб бораётганини кўряпман.

Энрике шунингдек, 60 ёшдан кейин фаолиятини якунлаши мумкинлигига ишора қилди:

— Мен ҳазил тариқасида укам Фелипега: “Мен сендан олдинроқ пенсияга чиқишим керак”, дейман. У мендан бир ёш кичик, ҳозир 55 ёшда ва 61 ёшида пенсияга чиқмоқчи. Энди ўзингиз ҳисоблайверинг, — деди мутахассис.

Маълумот учун, Луис Энрикенинг «ПСЖ» билан амалдаги шартномаси 2027 йилгача мўлжалланган.