Martin O’Nil boshqaruvi ostida Shotlandiya chempionatida g‘olib chiqqaniga qaramay, «Seltik» klubi yangi bosh murabbiy izlash bilan band. Bu haqda «Herald Scotland» nashri xabar bermoqda.

Jamoani boshqarish uchun bosh nomzod sifatida Uels milliy terma jamoasi ustozi Kreyg Bellami ko‘rilmoqda. Uning uchun Angliyaning «Byornli» klubi ham faol kurash olib boryapti. Manba bergan ma’lumotlarga ko‘ra, ingliz klubi vakillari allaqachon mutaxassisga yangi taklif bilan chiqishgan.

Shuningdek, boshqa nomzodlar qatorida Roberto Martines va Robbi Kin ismlari ham tilga olinmoqda, biroq hozircha klub yakuniy to‘xtamga kelgani yo‘q. Ertaga, 23 may kuni «Danfermlin»ga qarshi bo‘lib o‘tadigan Shotlandiya Kubogi final uchrashuvi O’Nil uchun «Seltik» boshqaruvidagi so‘nggi o‘yin bo‘lishi mumkin.