Italiyaning «Fiorentina» klubi yarim himoyachisi Robin Gosens A Seriya joriy mavsumidagi oxirgi o‘yinda «Atalanta» bilan ochko bo‘lishilganidan so‘ng, ushbu klubda qolish istagini bildirdi.
«Biz uchun qiyin mavsum bo‘ldi, shaxsan o‘zim jarohat tufayli uzoq vaqt safdan chiqdim. Jismoniy holatimni tiklash uchun ancha vaqt harakat qildim. Hozir biroz dam olish, kuch yig‘ish va yana davom ettirish istagi bor — umid qilamanki, aynan shu yerda. Men qolishni istayman», — deya futbolchining so‘zlaridan iqtibos keltiradi fiorentinanews.com.
Eslatib o‘tamiz, germaniyalik yarim himoyachi Florensiya klubida 2024 yildan beri to‘p tepib kelmoqda. Umuman olganda esa, u Italiyada 2017 yildan beri o‘ynab kelmoqda.
