Италиянинг «Фиорентина» клуби ярим ҳимоячиси Робин Госенс A Серия жорий мавсумидаги охирги ўйинда «Аталанта» билан очко бўлишилганидан сўнг, ушбу клубда қолиш истагини билдирди.
«Биз учун қийин мавсум бўлди, шахсан ўзим жароҳат туфайли узоқ вақт сафдан чиқдим. Жисмоний ҳолатимни тиклаш учун анча вақт ҳаракат қилдим. Ҳозир бироз дам олиш, куч йиғиш ва яна давом эттириш истаги бор — умид қиламанки, айнан шу ерда. Мен қолишни истайман», — дея футболчининг сўзларидан иқтибос келтиради fiorentinanews.com.
Эслатиб ўтамиз, германиялик ярим ҳимоячи Флоренция клубида 2024 йилдан бери тўп тепиб келмоқда. Умуман олганда эса, у Италияда 2017 йилдан бери ўйнаб келмоқда.
