«Manchester Yunayted» «Tottenxem» Angliya chempionatidan chiqib ketgan taqdirda, himoyachi Mikki van de Venni sotib olish variantini ko‘rib chiqmoqda. Agar «shporlar» APLda qolishsa, mankunianliklar futbolchiga taklif bilan chiqmaydi. Bu haqda jurnalist Ben Jeykobs «The United Stand» YouTube kanalida xabar berdi.
Manbaga ko‘ra, agar «Tottenxem» APLda qoladigan bo‘lsa, katta ehtimol bilan van de Ven klub bilan yangi shartnoma imzolaydi. Biroq, «Liverpul» tomonidan taklif tushsa, 25 yoshli o‘yinchi mersisaydliklar safiga o‘tishni afzal ko‘radi. Hozirgi vaqtda «qizillar» himoyachining transferi bo‘yicha rasmiy murojaat qilmagan.
Joriy mavsumda van de Ven barcha turnirlarda 44 ta o‘yinda maydonga tushib, 7 ta gol urdi va 1 ta golli uzatmani amalga oshirdi. Futbolchining klub bilan amaldagi mehnat shartnomasi 2029 yilning yozigacha mo‘ljallangan. «Transfermarkt» portali ma’lumotlariga ko‘ra, futbolchining bozor qiymati 65 million yevroni tashkil qiladi.
