«Манчестер Юнайтед» «Тоттенхэм» Англия чемпионатидан чиқиб кетган тақдирда, ҳимоячи Микки ван де Венни сотиб олиш вариантини кўриб чиқмоқда. Агар «шпорлар» АПЛда қолишса, манкунианликлар футболчига таклиф билан чиқмайди. Бу ҳақда журналист Бен Жейкобс «The United Stand» YouTube каналида хабар берди.

Манбага кўра, агар «Тоттенхэм» АПЛда қоладиган бўлса, катта эҳтимол билан ван де Вен клуб билан янги шартнома имзолайди. Бироқ, «Ливерпуль» томонидан таклиф тушса, 25 ёшли ўйинчи мерсисайдликлар сафига ўтишни афзал кўради. Ҳозирги вақтда «қизиллар» ҳимоячининг трансфери бўйича расмий мурожаат қилмаган.

Жорий мавсумда ван де Вен барча турнирларда 44 та ўйинда майдонга тушиб, 7 та гол урди ва 1 та голли узатмани амалга оширди. Футболчининг клуб билан амалдаги меҳнат шартномаси 2029 йилнинг ёзигача мўлжалланган. «Transfermarkt» портали маълумотларига кўра, футболчининг бозор қиймати 65 миллион еврони ташкил қилади.