«Real» hujumchisi Kilian Mbappe himoyachi David Alabaning mavsum yakunida klubni tark etishi munosabati bilan unga iliq tilaklar bildirdi. 22 may kuni Madrid klubi rasmiy sayti 33 yoshli avstriyalik futbolchi joriy mavsum yakunida erkin agentga aylanishini tasdiqladi.
Mbappe ijtimoiy tarmoqdagi sahifasida Alaba bilan xayrlashuv haqida yozib, uni yaqin do‘sti deb atadi:
«Birodarim, sen bilan bu bobni yopish oson emas. Sen nafaqat ajoyib futbolchi, balki inson sifatida undan ham ustunsan. Avvallari raqib bo‘lgan bo‘lsak, hozir esa «Real»da eng yaqin sheriklarimdan biriga aylanding. Hozir bemalol ayta olamanki, sen — futbol menga sovg‘a qilgan haqiqiy do‘stimsan. Kelajakdagi ishlaringda omad tilayman va qiladigan har bir qadamingni doimo qo‘llab-quvvatlayman», — deya yozdi Mbappe.
Eslatib o‘tamiz, Alaba «qirollik klubi» safiga 2021 yilning yozida kelib qo‘shilgan edi. Ushbu davr mobaynida avstriyalik himoyachi «Real» libosida 131 ta uchrashuvda maydonga tushib, 5 ta gol va 9 ta golli uzatmaga mualliflik qildi. U Madrid jamoasi bilan ikki karra Ispaniya chempioni, ikki karra Chempionlar ligasi va UEFA Superkubogi g‘olibi, shuningdek, ikki marta Ispaniya Superkubogi va bir marta Ispaniya Kubogi sohibiga aylangan.
