«Chelsi» jamoasining vaqtinchalik bosh murabbiyi Kalum Makfarleyn APL 38-turi doirasidagi «Sanderlend»ga qarshi o‘yin oldidan yarim himoyachi Koul Palmerni qo‘llab-quvvatlab chiqdi. Futbolchi Angliya terma jamoasining JCH-2026 uchun yakuniy tarkibidan o‘rin olmagani muxlislar va mutaxassislar o‘rtasida turli muhokamalarga sabab bo‘ldi.

Makfarleyn Sky Sports nashriga bergan intervyusida Palmerga nisbatan ishonchlari yuqori ekanini ta’kidladi:

«Men klub va o‘zim nomimdan Koulga bo‘lgan munosabatimizni ko‘p bor aytganman. Angliya terma jamoasi bosh murabbiyi o‘z tanlovini amalga oshirdi. Hozir eng yaxshi yo‘l — u bilan gaplashib olish. Biz Koulga to‘liq ishonamiz va uning yuqori darajali futbolchi ekanini bilamiz. Yakshanba kungi o‘yinda unga umid bog‘laymiz», — dedi murabbiy.

Shuningdek, Makfarleyn har qanday omadsizlikni muvaffaqiyat sari qadam deb bilish kerakligini qo‘shimcha qildi: «Hayotda va futbolda har bir muvaffaqiyatsizlikni ijobiy nuqtai nazardan qabul qilish kerak. Agar to‘g‘ri kayfiyat va iroda bo‘lsa, har qanday vaziyatdan foydali saboq chiqarish mumkin».