«Barselona» bosh murabbiyi Xans-Diter Flik madridliklar boshqaruvini qo‘lga oladigan Joze Mourinyo bilan bo‘lajak raqobat haqidagi savolga javob berdi. Portugaliyalik mutaxassis «qaymoqranglilar» rulida Alvaro Arbeloani almashtiradi.
La Liganing so‘nggi turi doirasidagi «Valensiya»ga qarshi o‘yindan (1:3) so‘ng jurnalistlar Flikka Madriddagi murabbiy almashinuvi borasida savol berishdi.
— Mourinyoning kelishiga tayyormisiz?
— Albatta. U ham boshqalar kabi shunchaki bir murabbiy, — deya qisqa javob qaytardi germaniyalik mutaxassis matbuot anjumanida.
Eslatib o‘tamiz, «Barselona» ushbu mavsumda 94 ochko jamg‘arib, La Liga chempioniga aylandi. «Real» esa 86 ochko bilan ikkinchi o‘rinni egalladi.
