«Manchester Siti» vingeri Jeremi Doku ijtimoiy tarmoqlarda 2025/26 yilgi mavsum yakunida jamoani tark etgan murabbiy Xosep Gvardiola, himoyachi Jon Stounz va yarim himoyachi Bernardu Silvaga bag‘ishlangan post qoldirdi.
«Birgalikda o‘tkazilgan uchta unutilmas mavsum. Klubdagi ilk kunimdanoq maydonda, mashg‘ulotlarda va kiyinish xonasida sizlardan juda ko‘p narsa o‘rgandim. Ushbu lahzalarni siz bilan baham ko‘rish imkoniyatiga ega bo‘lganim uchun minnatdorman.
Xotiralar, saboqlar va birgalikda qo‘lga kiritgan sovrinlarimiz uchun rahmat. Bularning barchasini shunday afsonalar bilan birga boshdan kechirganimdan juda xursandman!» — deyiladi Dokuning nashrida.
55 yoshli Xosep Gvardiola «Manchester Siti»dagi 10 yillik faoliyati davomida 20 ta sovrin yutdi. Ular orasida oltita Angliya chempionligi, Chempionlar ligasi g‘olibligi va boshqa kuboklar bor.
