Chempionlar ligasi finalida «PSJ» «Arsenal»ga qarshi maydonga tushadi. Parijliklar hujumkor yarim himoyachisi Xvicha Kvarasxeliya bo‘lajak bahs haqida gapirdi.

— Titulni himoya qilish juda qiyin deyishadi. Bu siz va jamoadoshlaringiz uchun murakkablik tug‘diryaptimi?

«Ha, menimcha, bu haqiqatan ham qiyin, buni o‘zimiz ham ko‘rdik. Bizda oxirigacha kurashishga to‘g‘ri kelgan ko‘plab o‘yinlar bo‘ldi va biz bir qancha juda kuchli jamoalarni mag‘lub etdik. Albatta, bu og‘ir, lekin ta’kidlaganimdek, bizda yuqori mahorat bor. Safimizda hamma narsaga qodir futbolchilar yig‘ilgan, shuning uchun biz faqat o‘zimizga ishonishimiz va ushbu sovrinni yutish uchun borimizni berishimiz kerak», — dedi Kvarasxeliya «PSJ» rasmiy saytiga.

Eslatib o‘tamiz, o‘tgan yili «PSJ» o‘z tarixida ilk bor Chempionlar ligasi g‘olibiga aylangan edi. O‘shanda Luis Enrike shogirdlari finalda «Inter»ni 5:0 hisobida mag‘lub etishgandi.

«PSJ» va «Arsenal» o‘rtasidagi final shu shanba, 30 may kuni bo‘lib o‘tadi.