Shotlandiyada «Napoli» klubi va Shotlandiya milliy terma jamoasi yarim himoyachisi Skott Maktominay tasvirlangan maxsus 20 funtlik banknota muomalaga chiqarildi. Bu haqda The Herald nashri xabar bermoqda.
Kupyurada futbolchining chalqancha uslubda (akrobatik tarzda) yo‘llagan zarbasi tasvirlangan. Illyustrasiya uchun Maktominayning 2026 yilgi Jahon chempionati saralashi doirasida Daniyaga qarshi o‘yinda (4:2) kiritgan goli asos qilib olindi. Ushbu gol Shotlandiya terma jamoasiga 1998 yildan buyon ilk bor jahon birinchiligining final bosqichiga yo‘llanma olishga yordam bergan edi.
Shotlandiya Banki o‘z bayonotida ushbu vaziyatni milliy terma jamoaning AQSHdagi Jahon chempionatiga yo‘l olishini ta’minlagan «tarixiy lahza» deb atadi.
Ma’lum qilinishicha, bunday banknotalardan jami 100 dona chiqariladi. Ularning yarmi to‘g‘ridan-to‘g‘ri sotuvga chiqariladi, 25 tasi yutuqli o‘yinlarda o‘ynaladi, qolgan 25 tasi esa auksion orqali sotiladi. Tushgan barcha mablag‘lar Shotlandiyadagi uysizlarga yordam beruvchi xayriya jamg‘armasiga yo‘naltiriladi.
Jahon chempionatining guruh bosqichida Shotlandiya terma jamoasi Braziliya, Marokash va Gaiti terma jamoalariga qarshi bahs olib boradi. Turnir shu yilning 11 iyunidan 19 iyuliga qadar AQSH, Kanada va Meksika maydonlarida bo‘lib o‘tadi.
