«Midlsbro» va Avstraliya terma jamoasi hujumchisi Rayli Makgri jarohati tufayli 2026 yilgi jahon chempionati final bosqichida ishtirok eta olmaydi, deb xabar beradi ESPN.
27 yoshli hujumchi APLga yo‘llanma beruvchi pley-off finalida «Xall Siti»ga qarshi kechgan bahsda (0:1) jarohat olib, 76-daqiqada maydonni tark etishga majbur bo‘lgandi.
Makgri Avstraliya terma jamoasining jahon chempionatidagi asosiy tarkib o‘yinchilaridan biri bo‘lishi kutilayotgan edi.
Ta’kidlash joizki, Makgri 2022 yilning yanvaridan buyon «Midlsbro» sharafini himoya qilib kelmoqda. 2025/26 yilgi mavsumda u 28 ta o‘yinda maydonga tushib, 6 ta gol urdi va 3 ta golli uzatmaga mualliflik qildi.
Futbolchi Avstraliya terma jamoasidagi debyutini 2021 yilning iyun oyida o‘tkazgan. Milliy terma jamoa safida u shu kungacha 35 ta o‘yinda maydonga tushib, 1 ta gol va 7 ta assist qayd etgan.
