«Paderborn» o‘z maydonida «Volfsburg»ni mag‘lub etib, 2026/27 yilgi mavsumda Bundesliga yo‘llanmasini qo‘lga kiritdi — 2:1 (asosiy vaqt 1:1, qo‘shimcha vaqtda 1:0).

Hisob o‘yinning 3-daqiqasida «Volfsburg» hujumchisi Jenan Peychinovich tomonidan ochildi. 38-daqiqada esa mezbonlar hujumchisi Filip Bilbiya muvozanatni tikladi. 100-daqiqada «Paderborn» himoyachisi Laurin Kurda o‘yinga yakuniy nuqtani qo‘ydi.

Ta’kidlash joizki, «Volfsburg» 14-daqiqadan boshlab himoyachi Yoakim Melening chetlatilishi sababli bir kishi kam bo‘lib o‘ynadi.

Eslatib o‘tamiz, ikki jamoa o‘rtasidagi dastlabki uchrashuvda hisob ochilmagan edi. Ikki o‘yin natijasiga ko‘ra (2:1), «Paderborn» Bundesliga yo‘llanmasiga ega chiqdi.

«Volfsburg» 2025/26 yilgi mavsumda Germaniya chempionati oliy divizionida 16-o‘rinni egallagan edi (34 o‘yinda 29 ochko). «Paderborn» (34 uchrashuvda 62 ochko) esa ikkinchi Bundesligani uchinchi o‘rinda yakunlagandi.

«Paderborn» shu vaqtga qadar Bundesligada ikki mavsum (2014/15 va 2019/20) ishtirok etgan. «Volfsburg» esa 1997 yildan buyon ilk bor oliy divizionni tark etdi.