«Падерборн» ўз майдонида «Вольфсбург»ни мағлуб этиб, 2026/27 йилги мавсумда Бундеслига йўлланмасини қўлга киритди — 2:1 (асосий вақт 1:1, қўшимча вақтда 1:0).

Ҳисоб ўйиннинг 3-дақиқасида «Вольфсбург» ҳужумчиси Женан Пейчинович томонидан очилди. 38-дақиқада эса мезбонлар ҳужумчиси Филип Билбия мувозанатни тиклади. 100-дақиқада «Падерборн» ҳимоячиси Лаурин Курда ўйинга якуний нуқтани қўйди.

Таъкидлаш жоизки, «Вольфсбург» 14-дақиқадан бошлаб ҳимоячи Йоаким Меленинг четлатилиши сабабли бир киши кам бўлиб ўйнади.

Эслатиб ўтамиз, икки жамоа ўртасидаги дастлабки учрашувда ҳисоб очилмаган эди. Икки ўйин натижасига кўра (2:1), «Падерборн» Бундеслига йўлланмасига эга чиқди.

«Вольфсбург» 2025/26 йилги мавсумда Германия чемпионати олий дивизионида 16-ўринни эгаллаган эди (34 ўйинда 29 очко). «Падерборн» (34 учрашувда 62 очко) эса иккинчи Бундеслигани учинчи ўринда якунлаганди.

«Падерборн» шу вақтга қадар Бундеслигада икки мавсум (2014/15 ва 2019/20) иштирок этган. «Вольфсбург» эса 1997 йилдан буён илк бор олий дивизионни тарк этди.