Tennis bo‘yicha ayollar o‘rtasidagi Fransiya ochiq chempionatining (“Rolan Garros”) asosiy to‘r bahslari qizg‘in pallaga kirdi.

Musobaqaning ilk davrasida o‘zbekistonlik tennischi Kamilla Rahimova o‘zining ilk uchrashuvini o‘tkazdi. 24 yoshli sportchi dunyoning 32-raketkasi, ruminiyalik Jaklin Kristianga qarshi kortga chiqdi va 2 soat-u 55 daqiqa davom etgan murosasiz bahsda 2:1 (6/3, 4/6, 6/4) hisobida g‘alaba qozondi.

WTA reytingida 89-o‘rinni band etib turgan Kamillaning ikkinchi bosqichdagi raqibi chexiyalik Karolina Muxova bo‘ladi. 29 yoshli Karolina hozirda dunyoning 10-raqamli tennischisi hisoblanadi. Mazkur bellashuv 27 may kuni Toshkent vaqti bilan soat 14:00 da boshlanishi belgilangan.

Eslatib o‘tamiz, yana ikki nafar o‘zbekistonlik tennischilar — Mariya Timofeeva va Polina Kudermetova “Rolan Garros” turnirining saralash bahslarida ishtirok etib, musobaqaning asosiy bahslariga yo‘llanma ololmagan edi.

Ma’lumot uchun, “Rolan Garros” dunyodagi eng nufuzli qumli kort turniri bo‘lib, hozirgi kunda ushbu qoplamada o‘tkaziladigan yagona “Katta dubulg‘a” musobaqasidir. Turnirda yakkalik bahslarida g‘olib bo‘lgan tennischi 2000 reyting ochkosi va 2,5 million yevro miqdoridagi mukofot puliga ega bo‘ladi.