Теннис бўйича аёллар ўртасидаги Франция очиқ чемпионатининг (“Ролан Гаррос”) асосий тўр баҳслари қизғин паллага кирди.

Мусобақанинг илк даврасида ўзбекистонлик теннисчи Камилла Раҳимова ўзининг илк учрашувини ўтказди. 24 ёшли спортчи дунёнинг 32-ракеткаси, руминиялик Жаклин Кристианга қарши кортга чиқди ва 2 соат-у 55 дақиқа давом этган муросасиз баҳсда 2:1 (6/3, 4/6, 6/4) ҳисобида ғалаба қозонди.

WTA рейтингида 89-ўринни банд этиб турган Камилланинг иккинчи босқичдаги рақиби чехиялик Каролина Мухова бўлади. 29 ёшли Каролина ҳозирда дунёнинг 10-рақамли теннисчиси ҳисобланади. Мазкур беллашув 27 май куни Тошкент вақти билан соат 14:00 да бошланиши белгиланган.

Эслатиб ўтамиз, яна икки нафар ўзбекистонлик теннисчилар — Мария Тимофеева ва Полина Кудерметова “Ролан Гаррос” турнирининг саралаш баҳсларида иштирок этиб, мусобақанинг асосий баҳсларига йўлланма ололмаган эди.

Маълумот учун, “Ролан Гаррос” дунёдаги энг нуфузли қумли корт турнири бўлиб, ҳозирги кунда ушбу қопламада ўтказиладиган ягона “Катта дубулға” мусобақасидир. Турнирда яккалик баҳсларида ғолиб бўлган теннисчи 2000 рейтинг очкоси ва 2,5 миллион евро миқдоридаги мукофот пулига эга бўлади.